مقعد تحت شجرة الجميز

حياته هي ارضه‏..‏ودنياه هي حقله‏..‏واولاده هم شرفه وعرضه‏..‏ورزقه هو حصاد سنابل القمح وزهرة القطن؟هو مغروس ليل نهار في طين الارض‏..‏مصلوب سحابة يومه تحت شمس حارقة وحكومة لاترحم حسب تعبيره‏!‏لو خرج من حقله ولو ليوم واحد‏..‏ لخرج من الحياة نفسها‏..‏اسمه أبومحمد‏..‏ قال للصحفية النشيطة التي ارسلتها اليه أنا ميش عايز أقول رأيي عشان ماحدش يزعل مني وياخد علي خاطره أصل كلمة الحق بتزعل‏'..‏ نتكلم علي حاجة حاجة ونشوف المشكلة فين ؟عندك مثلا الرز ـ يقصد الأرز ـ غالي ازاي وليه؟ثم بدأ الانفعال علي وجهه وهو يصرح بتلك الحقيقة‏'‏ علي الطلاق البلد مليانة رز شعير بس كله في مخازن التجار انتي عارفة التجار اشتروا مننا الطن بكام؟بألف وخمسين جنية وفضلوا مخزنينه لو روحتي للتاجر دلوقتي وقلتي له أنا عايزة منك بألفين وخمسمين جنيه يقولك لأ طب انت قاعد بيه لابس جزمتك وشرابك وكسبت أحسن من الفلاح اللي تعبان طول السنة كفاية عليك مكسب كدة وخلي أخوك المسلم ياكل معاك برضه مايرضاش يبيع قومي بكره طلعي اللي متخزن عند التجار بلدك حاتتملي رزسيبك من الرز عايزة ايه القمح؟ انتي عارفه ايه اللي بيحصل اللي عنده فدانين يقولك أنا حازرعهم كلهم بطاطس دي البطاطس حاتبقي بألف جنيه ويطمع بدل مايزرع نص قمح ونص برسيم ونص بطاطس ونص فاصوليا وبعد الطمع ده يحصل ايه؟ييجي يتزنق مثلا في البرسيم بتاع البرسيم يقوله القيراط بسبعين جنيه وتدفع الفلوس قبل ماتنزل الأرض ماهي ايه فرصة يقوله ماشي ياعم وده يزرع بطاطس وده علي ده ويروحوا المحطه تلاقي العدد كبير تقولك تنزل البطاطس ميت جنيه وبعدين تلاقي الجماعة الطماعين واقفين ونازلين دعا عالحكومة و الحكومة لا بيها ولا عليها سيبك من ده كل واحد عايز يحقق أكبر ربح محدش بيقول أخويا المسلم عايز يكسب وبس‏.‏من غير زعل الناس كل واحد عايز ياخداللي في ايد غيره احنا اتغيرنا مبقيناش زي زمان الناس بتغلي علي بعضها انتي عارفه في نهوه جنبنا واحد غلبان معندهوش أي حاجة خالص وبيزرع قيراطين بتوع واحدة من مصر بتقول كل يوم حد يروح لها من البلد ويقول لها أنا هاشتري منك القيراط بكذا ويروح التاني ويقول لها علي القيراط بألف زيادة وعلي كدة فضلوا يغلوا علي بعض وعلي الطلاق بالتلاتة القيراط وصلوه لتمن تلاف جنيه مفيش حد قال دة في واحد غلبان مدام أنا معايه فلوس طب أسيب الغلبان ياكل ده حتي حرام تقولي لمين ؟وعن أزمة رغيف العيش يقول أبو محمد الذي بدا واضحا من ضحكته أن له سرا خاصا وظني لم يخب قال لي‏'‏ الحكومة بتدي الفرن البلدي شيكارة الدقيق بكام ؟بتمانية جنيه يعني انتي عارفة لو انتي روحتي تشتري الشيكارة من الفرن حاتشتريها بكام ؟ـ بستين جنيه ياستي وتلاقيهم مخزنين الدقيق في شارع متكسر مايبانش عليه حاجه وتقولك لو بتوع التموين مسكوك لا تعرفني ولا أعرفك‏.‏قلت له شكلك كده جربت الكلام ده؟يضحك أبو محمد بخجل وهو يقول كانت غلطتي السنه اللي فاتت‏.‏قلت بسذاجه انا سعيدة لأنك اعترفت ان شراءك الدقيق من الفرن كان غلطة وكمان السنة اللي فاتتويرد ابو محمد وقد خيب ظني لأ أنا أقصد غلطتي لما زرعت الأرض كلها بطاطس واضطريت اني أروح اشتري شيكارتين دقيق من الولية بتاعت الفرن حطيتهم في الدودو وغطيتهم بجلبيتي وجيت هاعمل ايه؟أسأله‏:‏ إيه الدودو ده؟قال‏:‏ التكتك‏!‏ويكمل أبو محمد كلامه‏:‏ اللي عنده أرض الجمعية بتصرف له سماد؟فهو يعمل ايه يروح يأجر أرضه لواحد غلبان يزرعها وياخد ايجاره وهو قاعد بيه مكانه وخلاص مالوش دعوة بالأرض وبعدين ياخد بعضه ويروح الجمعيه يصرف السماد مثلا الشيكاره بسبعين جنيه يروح يبيعها في السوق السودا بميه و خمسين جنيه ومالوش دعوة بالمستأجر الغلبان ويطلع من ورا الجمعية بألافات وعلي كدة و انتي ماشية؟أسأل‏:‏ طب بصراحة كده انت ايه رأيك في عهد مبارك ؟يقول‏:‏ انتم عايزة من الراجل ايه ؟ ده كفاية أنه مارحش بهدلنا في الحرب لو الراجل ده كان دخل حرب بلدك بحالها كانت هتجوعـ ده راجل محافظ علي عيالناالستة دول يعني ايه ؟يعني ست أرامل أو حبة عيال ايتام الدولة مسئولة عنهم او ست بنات زيك عوانس‏!‏قلت له‏:‏ أنا لست عانسا‏..‏سألني عندك كام سنة؟ضحكت وقلت‏:‏ عندي تلاتة وعشرين‏.‏قال تبقي عانس انا بنتي يمكن قدك كدة وطولك بس يمكن أكبر منك بحاجة بسيطة وعندها ابنها عيد في تالتة ابتدائي وعندها بت كمان‏!‏انتي عارفة في حرب سبعة وستين مات ستة من أحسن شباب البلد منهم ابن عمي طبعا الشهادة دي شرف ماقلناش حاجة بس‏.‏كان عندنا مدرسة واحدة ومتكسرة وبالجهود الذاتية راح الريس هدها وبناها وبني غيرها ودخل نور وكهربا وتليفونات وطوابين عيش الطابونة بالاشتراك يجيلك العيش لحد باب بيتك ساخن الصبح واتنين جنيه ونص الاشتراك في الشهر‏!‏ماتصدقيش لو قالوا لك البلد مافيهاش خير مصر ليوم الدين حيفضل فيها خير ومحدش أبدا حايشكر الحكومة أمال يعني نعلق عيوبنا علي مين‏.‏عارفة الحكومة دي عاملة زي كلمة الامتحان الصعب الواد تلاقيه مذاكرش وبعدين يقولك أصل الامتحان صعب ثم احنا طول عمرنا بنشتكي عمرك سمعتينا قولنا الحكومة كويسة‏.‏انتي فاكرة لما عادل امام كان بيتريق عالحكومة في المسرحية لما قال الشقق رخيصة و المواصلات فاضية والطوابير صغيرة أهو كدة ولازم كدة ده الواحد لو عنده عيلين بيبقي ميش عارف يعمل فيهم ايه ؟مابالك بالملايين‏.‏أنا مهموم ولا أنام لأن عندي سبعة ابناء وأربعة أحفاد وزوجتي وأختي‏,‏ ولا أنام الليل مابالك باللي شايل هم ملايين ربنا يخليه لينا انتم متعرفوش غيره ممكن يعمل فينا ايه؟يسألني‏:‏ هي الانتخابات امتي ؟قلت له‏:‏ لسه بدري‏!‏قال‏:‏ نروحوا ننتخبوه مرة ثانية‏.‏لو كل واحد ياخد باله من أخوه كانت كل مشاكلنا تتحل‏..‏ زمان لو أنا عندي دار وعايز أبيعها يبقي ابيعها لجاري وبسعر قليل وعيب ابيعها للغريب دلوقتي ابيعها انشاله للعفريت الازرق مدام فيه فلوس أكتر‏!‏بقي يعني وبصفة عامة يعني هو مبارك مشكور ولا يعني أحنا قمنا شكرناه‏.‏‏................‏‏................‏إنتهي حذيث ابومحمد الي الصحفية التي ارسلتها اليه‏..‏إنه حديث من القلب لفلاح بسيط‏..‏ هو بالقطع حفيد الفلاح الفصيح‏..‏ ولكنه فلاح فاهم وعارف ولا أجدع سياسي من بتوع الفضائيات والتصريحات الملونة‏!

الاهرام