صدقته واستسلمت .. حكايتي عظة لكل البنات

أنا عايزة احكي حكايتى علشان البنات تعرف و ما تقعش فى اللى انا وقعت فيه ، من خمس سنين و انا بشتغل فى شركه كل شغلها على الانترنت ، و من خلال الانترنت و موقع شركتى حاول شاب باستماتة يكلمنى و قدر فعلا يخلينى اديله الايميل الخاص بي علشان احلله مشكلة ، وفضل يكلمنى كل يوم و فى اقل من شهر اتعلقت به و من وقتها لا انا عارفة احب غيره و لا عارفة اكمل معاه كانت عندى وجهة نظر ان الانترنت ما ينفعهش تقوم عليه علاقات حقيقية ..
بس هو شككنى فى كل افكارى و قال عليه انى مش هعرف احب حد ولا اتعامل مع حد ابدا فى حياتى علشان بعامله بالطريقة دى ، و فى نفس الوقت عرفت بنات كتير بتعرف شباب من على الانترنت ووقتها كان هو الانترنت الوسيلة اللى تخلينى اعرف بها شباب و اثبت لنفسى ان كلامه غلط.
ووقعت فى نصاب محترف ..عرف من كلامي أنى مش ممكن هتكلم معاه او اخوض فى اى كلام خارج ، فبدا يمثل عليه انه إنسان تقي و يعرف ربنا .. صدقته و استسلمت و حبيت اثبت لنفسى حاجة أنا طول عمرى مؤمنة بعكسها لكن رن فى ودانى كلام الشاب الأول أنى مش هعرف احب تانى و هنا اندمجت مع اول واحد غيره اتعرف عليه وأوهمني انه بيحبنى و بدانا نفكر فين هنعيش لما نتجوز و ازاى هيتقدم لاهلى و بعد قصة طويلة جدا هو كان البطل فيها الرجل اللى يعرف ربنا التقى المؤمن اللى لما كنت اكلمه كنت اسمع قران ... اد ايه احنا مسلمين وحشين لا نعرف نحافظ على دينا و لا نقدر نديله حقه ... نهاية الحكاية دى انه اخد منى فلوس و بعد اقل من شهر مش عارفة اوصله ولا اعمل معاه حاجة ... حتى مش عارفة اذا كان فى جهة امنية تساعدنى و لا لا من غير ما تشوشر علية .
انا بعتذر لاسلوب كلامى العامى بس انا كان نفسى تعرف حكايتى كل البنات علشان لو فيه واحدة بس هتتعلم من الحكاية دى يبقى كلنا كسبانين ، أنا عارفة أنى كنت غلطانة لما انهزمت قدام كلام مشوش و مكنش عندى ثقة بنفسى ولا باخلاقى اتمنى ان مفيش ولا واحدة يحصل معاها اللى حصلى