الجملة دى قالها صديق لى بغضب أثناء مباراه حامية بينى وبينه فى الطاوله ..و اللى كان حابسنى فيها فى خانة الياك..وكان الحوار بيننا داير سخن اكتر من سخونة كوبيتين الشاى اللى معانا.. على مين اللى حايترشّح لرئاسة الجمهورية الفترة الجاية..رديت عليه باندهاش: إشمعنى؟؟.. ماهى مصر بلد زى كل بلاد العالم.. شعب و أرض.. وحكومة وحاكم..إيه الصعب فى ده ؟؟؟فجأة لقيته قفل الطاولة..وحبسنى فى خانة النقاش السياسى ..وبدأها بأقوى "لأ" ..سمعتها فى حياتى : " لأ..مصر مش زى أى بلد فى الدنيا .." وكمّل كلامه بنفس درجة الغضب :اللى عاوز يعرفها صح..يروح يعيش وسط شعبها الحقيقى.. الناس اللى فى الأحياء الشعبية والمحافظات .. واللى فى القرى والنجوع..مهما كانت جنسيته ..عمره ما حايحس بغربه ..الأول حايتعامل ضيف وله واجبه عندنا .. وبعدين حايتعامل إبن بلد وله حق علينا..وفى الآخر حايتعامل صاحب مكان له ما لنا ..وعليه ما علينا المهم هو صدق حبه لمصر ..بذمتك فيه بلد كده فى الدنيا ..؟؟إتمطعت بسعادة قبل ما أرد عليه.. لمجرد إحساسى إنى حا تفوّق عليه فى المناقشة ..وأعوض حبستى قدامه فى قشاطات الطاولة وزهرها ...: "ياعم إحنا بنتكلم عن مصر وشعبها مش على اللى متمصرين ولّا الأغراب..ولا أنت اتزنقت ومش عارف ترد ؟؟؟"الحقيقة رد عليا رد رجع لى تانى شعور الزنقة فى الطاولة المقفوله : باقولك ده حال الغريب فيها..افهم إنت بذكائك ده طبيعة اولادها؟؟ مش أى حد يعرف يتعامل معاهم..حطهم فى بالك وقصاد عينيك كده فى صف واحد وشوف ..حاتلاقيهم..صعيدى.. بحيرى ..فيومى .. دمنهورى ..إسكندرانى ..نوبى.. عرايشى..شرقاوى ...وشوش وألسن على كل لون ..لكن اللى جواهم واحد..حاتلاقيهم بيعشقوا غناء أم كلثوم.. وبيخشعوا لتلاوة الشيخ محمد رفعت..و بيوقــّروا أولياء الله الصالحين ..بينــّوروا شمع للسيدة زينب ولسانت تريز..و من الصغير للكبير الكل بيفهم فى السياسة وفى الكورة ...!!ووقت أى أزمة.. الكل واحد..البلد دى حكاية.. وحدوته مصرية ميه المية ..بلد فات عليها جيوش إحتلال وطماعين ياما ..من الهكسوس فى زمن الفراعنة..لحد الأمريكان فى أيامنا دى....عينهم طالعه على ثراوتها ..لكن الخير والعمار فيها مابيخلصشى.. ومع كده حاتلاقى ان أغلب ناسها فقراء ..بلد لو تتأملها حا تسأل نفسك :مين ده اللى يقدر يحكم مصر..؟؟ مين فى زمن الإحتلال المصرى لمصر..يقدر يحكم مصر...؟؟سألته بإهتمام حقيقى : الإحتلال المصرى ؟؟ يعنى ايه ؟رد بسرعه وإنفعال : يعنى فيه شوية بشر محسوبين علينا مصريين..فعلوا فيها اللى ماعملوش الاحتلال من أى جنسية تانية..جوعوا ناسها.. وامرضوهم ..وقتلوهم..قال إيه .. بإسم انهم عارفين مصلحتهم اكتر منهم ..نهبوا خيرها وداينوها وسلطوا ناسها على بعضهم من ورا ستارة الدين والكورة ...شجعوا اللى يخربها.. وغرّبـوا اللى يفيدها..جـّرفوا العقول والنفوس فيها بخطه ماتـخُــرّش المـيـّه .. ده حتى الـمـّيه..افسدوها ...مين ده اللى يحكم بلد الأجداد فيها إستشهدوا فدائها فى نصر اكتوبر 1973وأحفادهم بينتحروا فى مركب هجرة وهمّ بيهربوا منها ..وبيدوّروا عن الحياة براها..!!شباب سمعوا عن أمجاد مصر سمع خير.. لكن ماشافوش من خيرها حاجة ..أجيال طلعت لا تحب مصر .. ولا تحب يوم تحكم فيه مصر ....مين ده اللى يحكم مصر بعد تسونامى الأسرار اللى إنكشفت بعد زلزال ثورة 25 يناير..وكشف ناس أقسموا يمين الله على الوفاء لها.. وماحدش خانها زيهم...ده لازم يكون ولد لسه ما اتولدش .. علشان أما ييجى الدنيا يتعلم حاجات كتيرة أوى ..يتعلم قيمة تاريخها.. وقيمة جغرافيتها .. يتعلم قيمة مسئوليته عنها..ولد ييجى من جيل مواليد يشدوا عضد بعض ..جيل يتربى على أخلاقها الأصيلة ..يدرس تاريخها الحقيقى.. يحافظ على إقتصادها ويكبره من غير سرقات..يحمى كيانها بدون خيانات..ويستمتع بخيراتها وثرواتها.. بالمساواه والحرية .. و يوصل للحكم فدائى بلا شروط ..ويحكمها كما لو كان بيشتغل عند شعبها...عشان ده يحصل.. عد عندك من دلوقت لربع قرن جاى على الأقل ..لحد ماجيل كبير يشرب الدرس ويربى أجيال تورث الخوف على البلد دى فى جيناتها ..وكل واحد فيهم يتصرف بمسئولية الحاكم الأمين على حكم مصر....فهمت بأه قصدى إيه ..إنه لسه ما اتخلقشى اللى يحكم مصر ...؟؟
المصدر : بوابة الشباب
المشاركات
ليست هناك تعليقات:
إرسال تعليق