من يعرف دوللي شاهين؟
انزل الشارع واسأل أي واحد ماشي في حاله »تعرف واحدة اسمها دوللي شاهين« أكيد حايبص لك من فوق لتحت ويرمقك بنظرات غاضبة، ويجري ليلحق بالميكروباص، وإذا جربت أن تسأل آخر أو آخرين فغالباً سينتهي الأمر بخناقة،لأنك غالبا لن تقبل الإهانة ولا الكلمات السخيفة والتعليقات المحرجة التي سوف تسمعها وسوف تتبين وتتأكد بنفسك أن من يعرف دوللي شاهين واحد من اثنين يا إما كذا أو كذا مالهاش ثالث! دوللي شاهين ظهرت في حياتنا عندما قدمها خالد يوسف في فيلم "ويجا"ويبدو أنه شعر بالندم ولم يفكر في التعامل معها مرة أخري، رغم أنه قدم بعد "ويجا"خمسة أفلام ولسبب ما أصبحت دوللي شاهين بطلة في بعض الأفلام المصرية مثل الشياطين والمش مهندس حسن وهي أفلام لم تحقق أي نوع من النجاح وماحدش شافها غير اللي اشتغلوا فيها ولكن واضح أن البنت فيها حاجة أو ميزة لا يعرفها إلا من يقترب قوي منها وهو التفسير الوحيد لاختيارها لتشارك في بطولة مسلسل أدهم الشرقاوي وتحصل علي مليون جنيه أجرا من قطاع الإنتاج في التليفزيون المصري! وطبعا المسلسل "راح في الوبي"رغم انه تكلف عشرين مليون جنيه!! والغريب في الأمر أن شركة صوت القاهرة اكتشفت في دوللي شاهين ميزات أخري، غير انها ما بتعرفش تمثل ولا تغني وهو السبب الوحيد لاختيارها لبطولة الست كوم "شريف ونص" الذي حصلت فيه علي أجر يزيد علي المليون ونص جنيه مصري!! طبعاً عايز تعرف المناسبة اللي تخلينا نجيب سيرة دوللي شاهين ،صاحبة الأغنية "الأبيحة" »لازم.... لما يشوفني«! في المؤتمر الصحفي الذي أقيم للإعلان عن مسرحية قطط الشوارع التي يشارك في بطولتها سمير صبري ودوللي شاهين ويخرجها عادل عبده لتقدم في اعادة افتتاح مسرح البالون تأخرت دوللي شاهين عن الموعد أكثر من ساعتين ثم حضرت بصحبة زوجها "اللي ماحدش عارف بيشتغل إيه" وبعد خمس دقائق حدثت مشادة بين "جوز الهانم" ورجال الأمن الذي حاول أحدهم أن يلفت نظره لأن التدخين ممنوع في القاعة قام سيادته قايل بلهجة لبناني كلام فارغ اعتبرها رجل الأمن إهانة وكلمة من هنا وكلمة من هنا حصلت خناقة وخرج الزوج الشهم غاضبا وتبعته دوللي شاهين غاضبة برضه وتركت الدنيا تضرب تقلب والناس بتضرب كفا بكف وتتساءل مين دي؟؟ بالذمة مش احنا نستاهل أكتر من كده!
الوفد
المشاركات
ليست هناك تعليقات:
إرسال تعليق