الخميس، 10 سبتمبر 2009

الهام شاهين : أنا نفسى "أتجوز " تانى


تحقيق طويل جدا لهبه الاباصيري مع الفنانة الهام شاهين ببرنامج مذيعة من جهة امنية على نايل لايف ...
دار التحقيق حول عدة موضوعات منها فيلمها واحد صفر ودور المراة المسيحيه في هذا الفيلم وعن اسباب انتاجها لفيلم واحد صفر وعلاقاتها بالوسط الفني وفشل زواجها ... وكان التحقيق كالاتي :
الاسم ؟ الهام السيد شاهين الحالة الاجتماعية ؟ مطلقة عنوان السكن ؟ شارع بيروت مصر الجديدة المهنة ؟ ممثلة المهنة في البطاقة ؟ بكالوريوس المعهد العالى للفنون المسرحية
هتفضلى لبسة حدادا على والدتك لحد امتى ؟ لحد ما اموت حزن ولا حالة نفسية ؟ هو قرار والحزن مش باللون ولا بالمظهر بس انا مش قادرة اتأقلم مع اى لون تانى من بعد رحيلها والدتك كانت بتمثلك ايه فى حياتك ؟ الحياة كلها و الهواء اللى بتنفسه و السند و الحضن الحنين و الحاجة الصادقة بجد اللى فى حياتى .انتى شخصية انفعالية و مشاكلك كثير تنكرى ؟ لا انا فعلاً كده و عصبيه جدا الى اقصى حد والعصبية دي جزء منها فى تكوينى شخصيا و الجزء الثاني انى مبحبش الحال المايل .انتى اتربينى على الانفعال و العصبية ؟ لابالعكس انا كنت بردة جدا و انا صغيرة مع الوقت بقيت عصبية و سالت دكتور نفسى قالى من كتر ما بتستعملوا جهازكوا العصبى فى تحويله من شخصيه لشخصية و من حالة لحالة بيحدث تلف فى الجهاز العصبى . انتى كمان متهمة ان مشاكلك الاعلامية كتيرة ؟ لا عادي اى فنان ممكن يبقى له مشاكل اعلامية بس انا بواجه يعنى لما بلاقي نقد برد عليه مش بطنش .نبدأ بأخر مشاكلك في فيلم واحد صفر لما قولتي ان المسيحين مش ملائكه ؟ اكيدبس انتى كده بتخسري شريحة كبيرة من جمهورك ؟ لا ابدا ... بس مفيش حد ملاك ولا المسيحين ولا المسلمين اللى انا منهم ولا اى حد في الدنيا .ايه اللى خلاكي تصرحي التصريح دة ؟ عشان هاجمونى انى ازاى اطلع امراة مسيحية وعايزة تخلف فى الحرام بدون زواج وان دة ادانه للمراة المسيحيه ... وانا مش شايفة ان دة ادانه دة ممكن يحدث للمراة المسيحية والمسلمة واليهودية فالمسالة ليس لها علاقة بالدين .فيه بلاغ ضدك انك بتحاولي تغيري بعض الثوابت في الكنيسة المصرية ؟ مفيش حد يعرف يغير الثوابت في الدين دي عيزة قرار صعب لانها حادة نزلة من عند ربنا .بس انتى ناقشتى في الفيلم مشكلة التصريح بالزواج الثاني في الكنيسة للمسيحية ؟ ايوة ولا زلت اقر بان دة حق انسانى انا كل كلامي من جانب انساني .
انتى مالك ومال الدين ؟
كل شئ في حياتنا يسيره الدين حتى سلوكياتنا فالدين معاملة واخلاق وانا مش بكلم في ثوابت دينية انا بكلم في جزء انساني عن امرأة مطلقة ولم يعطوها تصريح بالزواج ولا تقدر ان تعيش راهبة فماذا تفعل اكيد هتخطأ فبدل ما تخطأ نديها فرصة لحياة محترمة .تقبلي تتدخل امرأة مسيحية في الدين الاسلامي بحجة انها تدافع عن حقوق الانسان ؟ ايوة اقبل طالما انها تتكلم بالعقل والمنطق يبقى اقتنع برايها وفيه فعلا فيلم " أريد حلاً " غير حاجات في قوانين كانت خاصة بالدين الاسلامي وبعد كده بقى فيه خلع واعطى للمرأة حقوق كتير اوى هل كانت الفنانة فاتن حمامة تهاجم الدين الاسلامي لا طبعاً .فيه اتهام موجه لكي انك تمثلي بفلوسك ؟ لا فيلم واحد صفر مش بفلوسي ولا المسلسلات انا معملتش غير فيلم خلطة فوزية .يعنى انتى انتجتى عشان بعدتى عن السينما ونفسك ترجعيلها ؟ لا انا كان ممكن ارجعلها في نفس الفيلم من انتاج اخرين بس مكنوش هيقدموا الفيلم زى ما انا عملته كانوا هيحطوا عليه توابل تجارية واصلا الفيلم جالى من منتج بس طلب حاجات من المخرج لم يوافق عليها وانا كنت عايزة اعمل فيلم له قيمه فنية كبيرة وله رسالة ويبقى مشرف .هل التوابل دى مشاهد ساخنة ؟ لا طبيعة الفيلم مفيهوش مشاهد ساخنة . علاقاتك بالوسط الفني فيها مشاكل زى نادية الجندي واثار الحكيم ؟ عادى انا بختلف مع اخواتى في البيت دة لا يمنع انى بحبهم وعلاقتى حالياً بنادية الجندى جيدة جدا احنا بس اختلفنا بعد ما خلصنا فيلم الرغبة والاعلام هو اللي كبر الموضوع ودلوقتى اتصالحنا اما اثار فمفيش حاجة حصلت خالص بس البعض تصور اننا اختلفنا نتيجة انى عملت دورها فى ليالي الحلمية مع انى عملته بعد ما هى اعتذرت بسبب حملها .
انتى شخصية صعبة ؟ انا شخصية متقدريش توصفيها وصف احيانا صعبة واحيانا سهلة وسلسة جدا .عشان كدة لا يعيش لك رجالة ؟ ممكن لان انا متقلبة جدا .يعنى بتعترفي انك انتى سر فشل زواجاتك ؟ ايوة لان انا حبيت شغلى اكتر ما حبيت اى راجل في الدنيا وشغلي هو كياني وانا حبيت الهام اكتر ما حبيت الزوج دة فتزوجت مرتين وفشلت .عندك استعداد تتزوجى تانى ؟ اكيد كل ست فى الدنيا بتحلم انها تحب وتتزوج .قوليلي حاجة تخليني اخرجك من هنا ؟ اني خسارة متواجدش فنيا عشان اقدم فن جميل يسعد الناس واقدم افلام مشرفة لاسم مصر والسينما المصرية .


ليست هناك تعليقات:

إرسال تعليق